நெடுங்கவிதை: ஈரோடு எனக்குத் திருத்தலம்

Saturday, 30 December 2017 13:39 - பிச்சினிக்காடு இளங்கோ - கவிதை
Print

பேரோடும் புகழோடும்
பெரும்பணி ஆற்றும்
சீரோடும் சிறப்போடும்
சிந்தனையைத் தூண்டும்
ஈரோடு மக்கள்
சிந்தனைப் பேரபையின்
உலகத்தமிழ்ப் படைப்பரங்கில்
உங்கள்முன் நிற்கிகிறேன்
பிச்சினிக்காடு  நான்
பிறந்தது தமிழ்நாடுதான்
எனினும் எனக்கு
சிங்கப்பூர்
இரண்டாவது தாய்நாடு
தமிழ்நாடு

ஐம்பதாண்டு அதன்பெருவளர்ச்சியில்
இருபத்தைந்தாண்டு எனக்கும் சொந்தம்

தாய்மொழி
தமிழ்மொழியை
அரசுமொழியாய்
அலங்கரிக்கும் நாடு
எனவேதான்
எனக்குச் சிங்கப்பூர்
இரண்டாவது தாய்நாடு
தமிழ்நாடு
ஆனால்
ஈரோடு எனக்குத்
திருத்தலம்
மனிதனின் மானம் காக்கும்
ஆடைக்கு நூல்தரும்
மனிதனை மனிதருள்
மாணிக்கமாக்கும்
சிந்தனைக்கும் நூல்தரும்
ஈரோடு எனக்குத்
திருத்தலம்

ஈரோட்டில் இன்று
கவிதைத்திருவிழா
கவிதைக்குத் திருவிழா

ஈரோடு இன்று
கவிதையாய்ப்பூத்து
கவிதையாய்க்காய்த்து
கவிதைத்தோட்டமாய்க்
காட்சி அளிக்கிறது

கவிதைத்திருவுழா
கவிதைக்குத்திருவிழா
கவிஞனுக்கு இதுதானெ பெருவிழா

எனவே
ஈரோடுதான்
எனக்குத்திருத்தலம்

சிங்கப்பூரில்
கவிமாலையை
நிறுவிய கவிஞன் நான்
ஆனால்
ஈரோட்டில்
இன்றையமாலை
இனிய கவிமாலை

கவிதை  உலகில்
சிங்கங்கள் சிற்பிகள்
சிகரங்கள் இமயங்கள்
கணியன் பூங்குன்றன்கள்
காளமேகங்கள் வானம்பாடிகள்
ஒன்றுகூடும் உன்னதமாலை

சிலம்பாட்டம் கவிதையில்
செய்யயும்மாலை
சிந்தனைத் தேன்துளியைத்
தூவும்மாலை
ஞானஒளி கவிதைவழி
காட்டும் மாலை
மணக்கும் மாலையல்ல
கவிதையாய்க் கனக்கும் மாலை

இன்றையமாலை
இனியமாலை
அந்த
அரியமாலையை
அனைவருக்கும் தந்த
ஈரோடு
மக்கள்சிந்தனைப்பேரவையை
இதயத்தால் வணங்குகிறேன்

திருத்தலம் சென்று
திரும்பும் பயணம்
திருத்தலப் பயணமாகும்

திருத்தலம் சென்று
திரும்பும் பயணம்
தினந்தோறும் நடக்கிறது
திசைதோறும் நடக்கிறது

திருத்தலப் பயணம்
நதிதாண்டியும்
மலைதாண்டியும்
கடல்தாண்டியும்
கண்டம்தாண்டியும் நடக்கிறது

நடக்கும் இந்தப்பயணம்
நடையில் நடக்கிறது
காரில் நடக்கிறது
கப்பலில் நடக்கிறது
வானிலும் நடக்கிறது

நடக்கும் இந்தப்பயணம்
எதற்காக நடக்கிறது?
நடக்கும் இந்தப்பயணம்
நடப்பது எதற்காக?

கேள்வி எழுகிறது
மனசு
கேட்காமல் இருக்கிறது

திருத்தலப் பயணம்
சென்று திரும்பினால்……

வருத்தும் துன்பத்தின்
வலிமை குறையலாம்
வருத்தத்தின் வாயில்
அடைக்கப்படலாம்
துன்பத்தின் நுழைவு
தடுக்கப்படலாம்
நுழைந்த துன்பம்
துடைக்கப் படலாம்
கிடைக்காத அமைதி
கிடைக்கப்பெறலாம்
எட்டாத சொர்க்கம்
எட்டுமென எண்ணலாம்

இப்படி
எதைஎதையோ எண்ணித்தான்
திருத்தலப் பயணம்
திசைதோறும் நடக்கிறது
தினந்தோறும் நடக்கிறது

இவைவேண்டி பயணமென்றால்
இதைதீர்க்கும் பயணமென்றால்
நடக்கட்டும் திருப்பயணம்
நட்டம் நமக்கில்லை

திருத்தலங்கள் எல்லாம்
திருத்தும் தலங்களா?
இல்லை நம்மை
வருத்தும் தலங்களா?

கேள்வி எழுகிறது
மனசு
கேட்காமல் கேட்கிறது

கலப்படத்தைக் கவனமாய்க்
கடைபிடிக்கும் கயவன்
திருத்தலம் சென்று
திருந்தி திரும்பினால்
அதுதான் திருத்தலம்
ஆம்
அது
அவனைத் திருத்திய தலம்

திருத்தலம் சென்று
திரும்பியும்
திரும்பியும்
கலப்படம்செய்வதில்
கவனம் கூடினால்
திருத்தலம் தேவையா’?
திருத்தலப்பயணம்தான் தேவையா?
தெய்வமும்
கலப்படத்தொழிலுக்கு உதவியா?

கேள்வி எழுகிறது
மனசு
கேட்காமல் கேட்கிறது

வஞ்சகம் சூழ்ச்சி
வன்கொடுமை துரோகம்
பொறாமை திருட்டு
ஏதும் குறையாமல்
ஏகபோகமாய்
செய்து பிழைப்போர்கள்

திருத்தலம் சென்று
திரும்பினால் நன்மையா/?
திருந்தினால் நன்மையா?

திருத்தலம் சென்று
திரும்பவும் செய்தால்
தெய்வமே அதற்கு உடந்தையா

கேள்வி எழுகிறது
மனசு
கேட்காமல் கேட்கிறது

திருத்தலம் சென்று
தெய்வம் வணங்கி
திரும்பாமல்
ஒரு
திருப்பம் நிகழாமல்
முட்டி மோதி
நெருக்கடியில்
மூச்சுவிட மறந்ததையும்


இயற்கைப்பெருந்துணையால்
இறைவனடிச் சேர்ந்ததையும்
செய்தியாய்ப் படிக்கிறோம்
செய்தியாய்ப் பார்க்கிறோம்

திருத்தலம் சென்றோரை
திருப்பி அனுப்பாமல் – உயிரை
வழிப்பறிசெய்வதில்
வல்லமை அதிகம்
இயற்கைக்கா? இறைவனுக்கா?

கேள்வி எழுகிறது
மனசு
கேட்காமல் கேட்கிறது

திருத்தலம் என்றால்
திருத்தலம் சென்றால்
திருப்பம் மனதில் நிகழவேண்டும்
திருத்தம் வாழ்க்கையில் நிகழ்த்த வேண்டும்

உடலை உயிரை
வருத்திக்கொண்டு
ஊர்விட்டு உறவுவிட்டு
வருவோரை மேலும்
வருத்தினால் எப்படி
திருத்தலமாகும்?

கேள்வி எழுகிறது
மனசு
கேட்காமல் கேட்கிறது

திருத்தலம் என்றால்
திருத்தலம் சென்றால்

பொய்யும் புரட்டும்
திருட்டும் கொலையும்
அடியோடு அகலவேண்டும்

மனசெல்லாம் அறம்பூத்து
மணம்வீச வேண்டும்
கணந்தோறும் கொடை செய்து
கரம்சிவக்கவேண்டும்

அறிவில் தெளிவும்
அன்பு மொழியும்
ஆன்றோர் வழியில்
சான்றோ ராக்கும்
தலமே எனக்குத்
திருத்தலமாகும்

ஆம்
ஈரோடு எனக்குத்
திருத்தலமாகும்

மக்களைச் சந்திக்க
மக்களைச் சிந்திக்க
வழிகாட்டும் திருத்தலம்
வழிபோடும் திருத்தலம்
ஈரோடு அன்றி
எது வேறுதலம்?

சான்றோர் வருகின்ற
சான்றோரை அழைக்கின்ற
சிந்தனைப் பேரவையால்
சிறந்தது இத்தலம்
ஈரோடு
ஒரு
சிந்தனைத்தலம்
சிந்திக்கும் தளம்

எனக்கொரு வேண்டுதல்
என்னிடம் இருக்கிறது

இத்தனைமுறை திருத்தலம்
சென்று திரும்பினால்
நினைத்தவை எல்லாம்
நிறைவேரும் என்பதுபோல்
எனக்கொரு வேண்டுதல்
என்னிடம் இருக்கிறது

அது என்ன
வேண்டுதல்?

ஆண்டுக்கொருமுறை
ஈரோடு வரவேண்டும்
அதுவும்
ஆகஸ்டில் வரவேண்டும்

புத்தகக் கடலில்
மூழ்கி மூழ்கி
மூச்சடக்காமல்
முத்தெடுக்க வேண்டும்
காரணம்
மூளைக்குக் கொஞ்சம்
மூலதனம் வேண்டும்

அதை
வைப்புநிதியாய் வைத்து
வாழ்க்கையை நடத்த வேண்டும்
இல்லமும் உள்ளமும் வளம்பெற வேண்டும்
இல்லை இல்லை
ஒரு
வரலாறு படைக்கவேண்டும்

வாங்கிய மூலதனத்தின்
வட்டி பெருகாமல்
படித்து முடிக்கவேண்டும்
படிப்படியாய் சிந்தனையில்
பரிணாமம் பெறவேண்டும்
பரிமாணம் கூடவேண்டும்

ஆம்
எனக்குத்திருத்தலம்
ஈரோடுதான் – இங்கே
ஆண்டுக்கொருமுறை
வரவேண்டும்
ஆகஸ்டில் வரவேண்டும்
ஆயுள்முழுதும் வரவேண்டும்

வேண்டுதல் இதுதான்
விருப்பமும் இதுதான்

வேண்டி விடைபெறுகிறேன்.

This e-mail address is being protected from spambots. You need JavaScript enabled to view it

Last Updated on Saturday, 30 December 2017 13:44