மணமக்கள்!

நன்றி: தினக்குரல்!
மோதலின் போது வல்லுறவு போர்க்குற்றம், இனப்படுகொலை!
ஐ.நா.பாதுகாப்பு சபை தீர்மானம்!

ஆயுத மோதல்களின் போது பாலியல் வன்முறைகள் முன்னெடுக்கப்படுவதை முடிவுக்குக் கொண்டு வரவேண்டுமென வலியுறுத்தியிருக்கும் ஐ.நா.வின் பாதுகாப்புச் சபை இந்த நடவடிக்கைகள் போர்க்குற்றமெனவும் இனப்படுகொலையின் ஓரங்கமெனவும் சுட்டிக்காட்டியுள்ளது. பொதுமக்கள் மீதான பாலியல் வன்முறைகள் தொடர்பான சகல நடவடிக்கைகளையும் ஆயுதப் போராட்டத்தில் சம்பந்தப்படும் சகல தரப்பினரும் முழுமையாக முடிவுக்குக் கொண்டு வர வேண்டும் எனவும் உடனடியாக இது நடைமுறைக்கு வரவேண்டுமெனவும் ஐ.நா. பாதுகாப்புச் சபையின் 1820 ஆவது தீர்மானத்திற்கு சபையின் 15 உறுப்பினர்களும் ஏகோபித்து அங்கீகாரம் வழங்கியுள்ளனர். அத்துடன் மோதலில் சம்பந்தப்பட்ட சகல தரப்பினரும் பெண்கள், சிறுமிகள் உட்பட பொதுமக்கள் மீதான சகல விதத்திலுமான பாலியன் வன்செயல்களிலிருந்தும் அவர்களைப் பாதுகாப்பதற்கான பொருத்தமான நடவடிக்கைகளை உடனடியாக மேற்கொள்ள வேண்டும் என்றும் வலியுறுத்தப்பட்டுள்ளது.

அமெரிக்காவின் வெளிவிவகார அமைச்சர் கொண்டலீசா ரைஸ் தலைமையில் இடம்பெற்ற சபையின் அமர்வின்போதே இந்தத் தீர்மானம் நிறைவேற்றப்பட்டுள்ளது.

பாலியல் வல்லுறவு மற்றும் பாலியல் வன்செயல்களை போர்க்குற்றமென வடிவமைக்க முடியும். இவை மனிதாபிமானத்திற்கு எதிரான குற்றச்செயலில் அல்லது இனப்படுகொலைக்கான நடவடிக்கை எனக் கருதமுடியும் என்று சபை தெரிவித்துள்ளது.

போர் நடவடிக்கைகளின்போது பாலியல் வல்லுறவில் ஈடுபடுவோரை ஹேக் நகரிலுள்ள சர்வதேச குற்றவியல் நீதிமன்றத்தின் முன்னால் நிறுத்தி விசாரணை செய்வதற்கான மறைமுகமான அச்சுறுத்தலாக இதனைக் கருத முடியும்.

இதனை உடனடியாகவே மனிதஉரிமை கண்காணிப்பகம் வரவேற்றிருக்கிறது.

ஐ.நா. பாதுகாப்புச் சபையின் பாலியல் வன்முறைகள் தொடர்பான புதிய தீர்மானம் வரலாற்று முக்கியத்துவம் வாய்ந்த வெற்றியெனவும் மோதலில் போது அடிக்கடி பெண்கள், சிறுமிகள் புறக்கணிக்கப்படும் நிலைமை இருந்து வந்ததாகவும் மனித உரிமை கண்காணிப்பகம் சுட்டிக்காட்டியுள்ளது.

ஐ.நா.பாதுகாப்புச் சபையில் இந்தத் தீர்மானம் வாக்கெடுப்புக்கு விடப்படுவதற்கு முன்னர் ஒருநாள் விவாதத்துக்கு அமெரிக்கா அழைப்பு விடுத்திருந்தது . இந்த விவாதத்தில் உரையாற்றிய கொண்டலீசா ரைஸ் பாலியல் வல்லுறவு மன்னிக்கமுடியாத குற்றமெனவும் உலகளாவிய ரீதியில் பெண்கள் மோதல் சூழ்நிலைகளில் மோசமாகப் பாதிக்கப்படுவதாகவும் பாலியல் வன்முறைகள் பெண்கள் மீது வேண்டுமென்றே மேற்கொள்ளப்படுவதாகவும் கூறியிருந்தார்.  நேற்று நிறைவேற்றப்பட்ட தீர்மானமானது குற்றச்செயல்களை வெளிச்சத்துக்குக் கொண்டு வருவதற்கான பொறிமுறையெனவும் குறிப்பிட்ட ரைஸ் ஆயுதப் போராட்டத்தின் போது இடம்பெறும் பாலியல் வன்முறைகள் தொடர்பான விபரங்களைத் திரட்டி நடவடிக்கை எடுப்பதற்கான செயற்பாட்டுக்கு ஆயத்தப்படுத்துமாறும் ஐ.நா. செயலாளர் நாயகத்தை அவர் கேட்டுள்ளார்.

http://www.thinakkural.com/news/2008/6/21/importantnews_page53097.htm