மணமக்கள்!

சௌந்தரி கவிதைகள்1

மௌனம்!

நானும் நீயும் இணைந்து நடந்தோம்
நடந்த பாதையெல்லாம்
கதைத்துக் களைத்தோம்.
நீண்ட இடைவெளி,
இனிமையான சந்திப்பு

வன்கோவும் பிக்காசோவும்
உன் மனவெளியில்
வாலியும் கண்ணதாசனும்
என் விழியோரத்தில்

நானும் நீயும் படித்த புத்தகங்கள்
பதித்த தத்துவங்கள்
முரண்பட்டு நிற்கின்றன
முரண்பட்ட கருத்துக்கள்
மோதுகின்ற கட்டத்தில்
மூச்செறிந்துவிட்டு, ஏனோ
மௌனித்து விடுகின்றோம்

ஏன் இந்த மௌனம்
சொல்ல நினைப்பதை
சொல்ல விரும்பாத மௌனம்
ஒருவரை ஒருவர்
அறிந்து கொண்டோமா - இல்லை
உடலும் மனமும்
தேடும் அடைக்கலம்
அழிந்துவிடும் என்ற வருத்தமா!

நானும் நீயும் நாமாக . . . . .

நீ நினைக்கும் பொழுதெல்லாம்
தென்றலாக வீசமறந்தால்;
என்னை புயலென்று சொல்லிவிடாதே!

நீ தூங்கும் நேரமெல்லாம்
உன் கனவோடு வருவதனால்;
என்னை நிஐம் என்று நம்பிவிடாதே!

நீ போகும் பாதையெல்லாம்
உன் நிழல்போல் தொடராவிடில்
என்னை முடமென்று பெயர்சூட்டாதே!

நீ விரும்பும் கணமெல்லாம்
உன்னைப் படரமறுத்துவிட்டால்
என்னை மரமென்று கொச்சைப்படுத்தாதே!

நீ கேட்கும் போதெல்லாம்
நான் வெளிச்சம் தரமறுத்தால்
என்னை இருட்டென்று மாட்டிவிடாதே!

நீ குட்டும் போதெல்லாம்
நான் குனிந்து கொள்வதனால்
என்னை அடிமையென்று அவமதிக்காதே!

நீ பேசும் போதெல்லாம்
நான் மௌனித்திருப்பதனால்
என்னை ஊமையென்று எண்ணிவிடாதே!

நான் நானாகவும் நீ நீயாகவும்
நானும் நீயும் நாமாகவும் இருக்கும்போதே
நாளைய பொழுது நலமாக விடியும்;.

ஈர்ப்பு

தனிநிகரான உன் உலகத்தில்
துணிவாக தடம்; பதித்தேன்
அந்நியமான என் கண்களுக்கு
ஆச்சரியமான பல தோற்றங்கள்;
ஈர்த்துக் கொண்டேன் - நீ
விரும்பியும் விரும்பாமலும்
சேர்த்துவைத்த பெரும் ஊதியத்தை

உன் நிகரற்ற மண்டலத்தில்
ஆர்வமிக்க மாணவி நான்
சீர்ப்படாத தொடர் வரலாற்றில்
வியப்பான நாகரீகப்படிவம் நீ
உன் சிந்தனையின் ஆழத்தை
உற்றுநோக்கி பதிவுசெய்தேன்
திரும்பத் திரும்பக் கூறிக்கொண்டேன்
முன்பே உனதாக்கிக் கொள்ளென்று

உன் மனமாற்றப் படிநிலையின்;
நிழல்வெளியில் எனக்குள் பலமாற்றம்;
நகைப்பொலியில் முகமலர்வேன்
ஊற்றெடுக்கும் நீர்த்துளியில்
உடையாமல் போட்டியிட்டு
உள்ளத்தால் முதிர்வடைந்தேன்
என் தொலைத்தோற்ற மனக்காட்டி
உள்முகம் நோக்கி சொன்னது
உன்விலை என்னவென்று

நீ அடிக்கடி மிதிபட்ட பாதையில்
முடிவெச்ச வடிவமானேன்;
உன் கரையற்ற நீர்வரைவில்
காற்றோடு கரையேறும் படகானேன்
நீ இடைவிடாது செதுக்கிய
பாறைவெடிப்பு இடைவெளியில்
ஊடுருவி தேடிக்கண்டேன்
பசும்புல்தரை கொண்ட
சுரங்க வழிப்பாதையொன்றை
அளவுகோல் வைத்து
அளக்கமுடியாத எல்லைபோலும்
அமைதியாக செல்கின்றேன்
அமிழ்வுக்குப் பின்னாலும்
மிதந்துவரும்; மிதவையாகி

tary22@yahoo.com.au