மணமக்கள்!

கவிதைகள்!

எழுத்தாளர் சிவலிங்கம் சிவபாலன் நினைவாக...
மறக்கவொண்ணா மனிதனவன்..!

- - வி. ரி. இளங்கோவன் -

பூவிலும் மெல்லியதாய்ப் புன்சிரிப்பு
புகுந்து உள்நோக்கிடும் விழிகள்
நாவினில் நறுங்கனிச் சொற்கள்
நாளும் மறக்கவொண்ணா மனிதன்..

காமனை ஒக்கும் சிவபாலனவன் - பொல்லாக்
காமத்தைப் பெரிதென நினையாதவன்
சோமனைப்போல் குளிர்ப் பேச்சினன் - நாளும்
சுறுசுறுப்பான தமிழ்ப் படைப்பாளனவன்..

உடலுக்கணிகலங்கள் பலவேண்டும் என்பார்
உயிருக்கு அழகெதுவெனத் தெரியாதார்..
கடனுக்குவேண்டியும் கட்டியழகு பார்ப்பார்
காலனைவென்றவர் வாழவா போகிறார்..?

மணத்தையே நுகரத்தான் விரும்பி
மலரினைக் கசக்கிடுவார் சிலர்
பணத்தையே பெரிதென் றெண்ணிப்
பாதகம் புரியவும் துணிவார்...!

குணத்தையே விலைக்குப் பேசித்தினம்
குரங்காட்டம் போடுவார் அவர்..
இனத்தையே எண்ணாமல் நாளுமந்த
இருப்பையே பெருக்குவாரை இகழ்வாய்..!

கரையறியாக் காட்டாற்று வெள்ளம்போல
கவிதைமழை பொழிவாய் அரங்குதோறும்
நிரைநிரையாய் கட்டுரை கதைகள்பலவும்
நிறையத்தான் எழுதியிங்கே நிலைத்திட்டாய்..!

உரைநடை யாப்பிலக்கணம் கவிதைவழி
உணரணும் கொஞ்சந்தானும் என்பாய்
வரைகின்ற வார்த்தையெல்லாம் வளமாக
வடித்திட்ட உன்படைப்புகள் வாழும்..!

அற்பமாய் உன்னாயுள் குன்றியங்கே
ஆழ்ந்திடுவாய் உறக்கமதி லென
சொற்பனந் தன்னிற் கூடவே
எண்ணிட வில்லை நண்பா...!

இறுதியாய் என்விழாவில் கலந்தங்கே
இலண்டனிலும் என்கவிதை சொன்னாய்
மறக்கமுடியுமா உன்னையே நானும்
மனதிலே வருகிறாய் நாளும்...!

vtelangovan@yahoo.fr