'நிலாவின் இந்திய உலா' நூல் வெளியீட்டு விழா!
- உதயகுமாரி பரமலிங்கம் -

சென்னையில் உள்ள லீக் கிளப்பில்  ஆகஸ்ட் 29 ஞாயிறன்று காலை பத்து மணியளவில் துவங்கியது நிலா எழுதிய 'நிலாவின் இந்திய உலா' நூல் வெளியீட்டு விழா! பிரபல இலக்கியவாதிகள் திரு ஞாநி , திரு பிறைசூடன் மற்றும் திரு யுகபாரதி ஆகியோர் முன்னிலையில் எழுத்தாளர் திரு வித்யாசாகர் அவர்களின் தாயார் குத்துவிளக்கேற்ற திருமதி பிரியா ரமேஷ் அவர்கள் தமிழ்த்தாய் வாழ்த்துப்பாட, இன்னுயிர் ஈந்த ஈழத்தமிழர்க்கு இதய அஞ்சலி செலுத்தி இனிதே துவங்கியது விழா.

திரு இராசேந்திர உடையார் தொகுத்து வழங்க வந்திருந்த விருந்தினர்களை இனிதே வரவேற்றார் சுபாஜினி. தொடர்ந்து திரு ஞானி அவர்கள் 'நிலாவின் இந்திய உலா' நூலை வெளியிட திரு பிறைசூடன் மற்றும் திரு யுகபாரதி ஆகியோர் பெற்றுகொண்டனர். தொடர்ந்து பேசிய 'ஆலயம்' அமைப்பின் இயக்குனர் திரு இராஜவேல் நூலாசிரியர் சிறப்பு குறித்து பேசினார். அதைத்தொடந்து பேசிய கவிஞர் யுகபாரதி நூலின் சிறப்புப் பற்றி எடுத்துரைத்தார். கவிஞர் பிறைசூடன், பிறரை குறை கூறிகொண்டிருப்பதைவிட அவர்களை எமக்கு சாதகமனவர்களாக ஆக்குவதே சிறப்பு என்று குறிப்பிட்டார். மேலும் நூலாசிரியருக்கு கவித்திறனும் சேரப்பெற்றுள்ளது என நூலின் பகுதிகளையும் தொட்டுக்காட்டிப் பேசினார்.

எழுத்தாளர் ஞாநி, இயலாமையைப் புறந்தள்ளி மிளிர்ந்து நிற்கும் நிலாவுக்கு கல்வி தான் மிகவும் கைகொடுத்திருக்கிறது, அதன் மூலம் தன்கைகளை அகலவிரித்திருக்கிறார் எனப் பாராட்டிப் பேசியதோடு நிலாவின் இணையத்து நண்பர்களையும் வியந்து நன்றி கூறினார். இந்த விழாவின் சிறப்பே கைகால்கள் இயக்கம் குன்றிய நிலாவின் இந்தியப்பயணத்தின் போது துணை நின்ற தன் இணையத்து நண்பர்க்காய் அர்ப்பணித்த 'நிலாவின் இந்திய உலா' என்ற நூலின் வெளியீட்டு விழாவதனை மேலும் பல நண்பர்கள் இணைந்து குடும்ப விழாவாக நடாத்தி மகிழ்ந்தது தான்.

இணையத்து நண்பர்கள் தம்திறன் தெரிவிக்கும் நிகழ்வுகளைத் துவங்க மறுபுறம் வாழையிலையில் தமிழ்ப்பண்பாடு மணக்க உணவு பரிமாறலுடன் இனிது நிறைவேறியது விழா.

மேலும் சில நிகழ்வுக் காட்சிகள்

nilaaa2001@googlemail.com