மணமக்கள்!

மீள்பிரசுரம்: நிகழ்வுகள்.காம்
டி.கே பட்டம்மாள் மரணம்

சென்னை - வியாழன் 16 ஜுலை 2009 பிரபல கர்நாடக சங்கீத வித்வான் டி.கே. பட்டம்மாள் சென்னையில் இன்று காலமானார்.
அவருக்கு வயது 90. கர்நாடக இசை உலகின் அரசியாக விளங்கியவர் டி.கே. பட்டம்மாள். எம்.எஸ்.சுப்புலட்சுமி, எம்.எல்.வசந்தகுமாரி
மற்றும் டி.கே. பட்டம்மாள் ஆகியோர் கர்நாடக இசையின் முப்பெரும் தேவியராக விளங்கியவர்கள் ஆவர். இவர்களில் பட்டம்மாள் தவிர
மற்ற இருவரும் ஏற்கெனவே காலமாகிவிட்டனர்.

பட்டம்மாள் கடந்த 1919ம் ஆண்டு மார்ச் மாதம் 28ம் தேதி பிறந்தார். அவரது தந்தை தாமல் கிருஷ்ணமூர்த்தி. ஆசாரமான பிராமண
குடும்பத்தில் பிறந்த பட்டம்மாளுக்கு அலுமேலு என்பது இயற்பெயராகும். பட்டா என்று அன்புடன் அழைக்கப்பட்ட அவர் சிறு வயதிலேயே தனது தாயார் காந்திமதியம்மாளிடம் இசை பயின்றார். ஆசாரமான குடும்பத்தில் பிறந்த அவர் உறவினர்கள் முன்பாக பாடக்கூட அனுமதிக்கப்படவில்லை.

கடந்த 1929ம் ஆண்டு தனது 10வது வயதில் பட்டம்மாள் முதல்முறையாக சென்னை வானொலியில் பாடினார். பின்னர் 13வது வயதில் முதல்முறையாக ரசிக ரஞ்சன சபாவில் இசை நிகழ்ச்சி நடத்தினார். கடந்த 1939ம் ஆண்டில் அவர் ஈஸ்வரன் என்பவரை திருமணம் செய்து கொண்டார்.

கர்நாடக இசைக் கச்சேரிகள் மற்றும் பக்திப் பாடல்கள் மட்டுமே பாடி வந்த பட்டம்மாளை திரைப்படங்களில் பாட பாபநாசம் சிவன் அறிமுகம் செய்து வைத்தார். பல்வேறு திரைப்படங்களில் பாட அவருக்கு வாய்ப்புகள் வந்த போதும், பக்தி மற்றும் தேசபக்தி பாடல்களை மட்டுமே அவர் திரைப்படங்களில் பாட முன்வந்தார்.

பாரதியாரின் பல பாடல்களை அவர் பாடி அவை இன்று ரசிகர்களால் பெரிதும் போற்றப்படுகிறது.

நாடு முழுவதும் பல்வேறு இடங்களுக்கு சென்று இசை நிகழ்ச்சிகள் நடத்திய பட்டம்மாள் அமெரிக்கா, கனடா, பிரான்ஸ், ஜெர்மனி, சுவிட்சர்லாந்து மற்றும் இலங்கை ஆகிய நாடுகளுக்கும் சென்று இசை நிகழ்ச்சிகள் நடத்தியுள்ளார். பட்டம்மாள் பிரபல சங்கீத் வித்வான் டைகர் வராதாச்சாரியிடமிருந்து கான சரஸ்வதி விருதைப் பெற்றார். கடந்த 1971ம் ஆண்டு பத்ம பூஷன் மற்றும் 1998ம் ஆண்டில் பத்ம விபூஷன் வருதையும் பெற்றார்.

தனது இளைய சகோதரர் டி.கே. ஜெயராமனுடன் இணைந்து பல கச்சேரிகள் நடத்தியுள்ளார். தற்போது பிரபல இசைக்கலைஞராக உள்ள ;நித்யஸ்ரீ மகாதேவன் இவரது பேத்தி என்பது குறிப்பிடத்தக்கது.

உடல் நலம் பாதிக்கப்பட்டிருந்த டி.கே. பட்டம்மாள் இன்று சென்னையில் காலமானார்.

நன்றி: http://www.nigazhvugal.com/